For at ressursane skal bli best mogeleg utnytta bør fleire tiltak bli gjennomført samla. Ei slik samanslåing i gjennomføringsfasen kan vere basert på ei geografisk samling av tiltak og/eller ei tematisk samling knytt til at prosjekta krev like leveransar (utdjuping, merkefundament etc).

– Ei samla løyving til tiltak under 100 millionar kroner gir oss ein større fleksibilitet og gjer det enklare å planlegge og utføre ulike tiltak over ei lengre strekning. Då får vi ei meir effektiv gjennomføring av prosjekta, og ei mindre «stykkevis og delt» utbetring av farleiene, seier leiar for utbyggingsavdelinga i Kystverket, Jostein Bøhlerengen Moe.

Dei 44 tiltaka i denne porteføljen omfattar prosjekt som skal gjere farleier breiare, djupare og rettare, og slik lette manøvreringa. Prosjekta inneber også ny merking av farleiene. Vedlikehaldstiltak i farvatnet, slik som vedlikehaldsmudring og vedlikehald av moloar og kaier i Kystverkets eige, inngår også i tiltaksporteføljen.

Tidspunkt for gjennomføring vil avhenge av dei årlege budsjettløyvingane og korleis kostnadar og nyttevurderingar utviklar seg ved vidare optimalisering av tiltaka.