Den noverande kystdirektøren fekk dermed fornya tillit som øvste leiar for Kystverket.
– Arset er ein dyktig leder og har ført Kystverket gjennom ei viktig omstilling. Han har vore i spissen for arbeidet til etaten med å sørge for effektiv, sikker og miljøvenleg sjøtransport langs kysten. I ei tid der den sikkerheitspolitiske situasjonen og trusselbiletet har blitt endra og skjerpa så er Arset godt skikka til å leie etaten vidare, seier fiskeri- og havminister Marianne Sivertsen Næss.
– Eg er glad for å få halde fram i denne rolla, seier Einar Vik Arset. Med seks år bak seg i stillinga og eit sterkt engasjement for Kystverket sitt oppdrag, ser Arset fram til det vidare arbeidet med å gjere sjøvegen trygg, effektiv og miljøvenleg.
– Noreg er ein betydeleg sjøfartsnasjon. 90 prosent av alt gods til og frå Noreg kjem sjøvegen og sjøtransporten er kritisk viktig for norsk verdiskaping. Kystverket skal bidra til sjøsikkerheit, til grøn omstilling og vi er ein vesentleg totalforsvarsaktør. Eg er audmjuk overfor ansvaret det inneber, seier Arset.
– Eg er dessutan glad for å få fortsette i ei utprega operativ verksemd som eg er stolt av. Vi skal utvikle tenester og organisasjon vidare for effektivt løyse våre samfunnsoppdrag. Kystverket som organisasjon står sterkt mellom anna takka vere flinke folk, meiningsfulle oppgåver og gode samarbeid med mange aktørar, legg han til.
Einar Vik Arset (48) begynte i jobben som kystdirektør i februar 2019. Han kom da frå stillinga som rådmann i Ulstein kommune. Han har hovudfag i strategi og leiing frå Norges Handelshøyskole (NHH) i 2003.